انا والبطيخ وهواك برنامج للحب وعن الحب .....
الحب!!!!!!!!!!
ذلك الشعور السهلبيسى الذى يزغزغ عقول البشر ويهشك قلوبهم ....
مستمعينا لسه بنتكلم عن الحب وحلقتنا النهرده عن الاستهبال فى الحب ...
معاكم لوما ع نجوم fm مزيكا ع كيف كيفك فى انا والبطيخ وهواك ............
من دلوقتى ولمده ساعتين مستنين تليفوناتكم ع 0000000 011اوعلى 0100000000 او ع اميل البرنامج ع هواك ات نيل راديو بروداكشن دوت كوم برعايه توتا كومبانى وان تاتش وكريم زحلقها ...........
دايما بتمر بينا اوقات بنحس فيها اننا مش قادرين نعيش من غير الحب ومن غير الحبيب والشعور دا متولد ومنبثق من الاحساس التواجدى الكونى فى اللامركزيه العصبيه للقلب ودايما بتقابلنا مواقف كلها استهبال فى الحب .
ياترى احنا بنعمل ايه ورد فعلنا ايه لما بنقابل حد بيستهبل فى الحب وخصوصا اننا جيل بتاع موبايلات وانتوا عارفين انا عندى 22 سنه فحاسه بيكم وحاسه بمشاكل الجيل كلها .......
اولا الرصيد اللى بيخلص فى اليوم وانت لسه شاحن كارت ب 100 جنيه وتفضل تحرق فى دقايق ع حبيبتك وفى الاخر لما الرصيد يقرب يخلص تقولها بحبك بحبك اموووووووووووووه تقولك انت بتستهبل يا حبيبى اتلم شويه عم ( سويرس ) يشوفنا اصل هى 012 ........
او حبيبتك اللى تفضل تكنسل عليك تكنسل عليك علشان استخسرت فيها كوزين دره ع الكورنيش وانت اصلا مفلس مش لاقى تاكل ولما تيجى تصالحها ع الموبايل تلاقيها تكنسل عليك فتضر تصالحها بكارت ب 5 وتستهبل تلاقيها بتصرخ فى وشك وتقول انت بتستهبل ؟؟ اقل من 200 متورنيش خلقتك .........
وحبيبك اللى بيجى فى اوقات عامل فيها عالم فلك ويقولك انا بقرا الكف ويفضل ماسك فى كف ايدك ولا كانه شاف ادين قبل كده وفى الاخر تقوليله انت بتستهبل ؟؟ حد يشوفنا ........
مستمعينا الاستهبال فى الحب حاله بتمر بكل المهاطيل والمهابيل من ابناء الجيل ولو مستخدمناش عقلنا فى الاستهبال بيتقلب الى عبط ومغص كلوى ...........
**** مستمعينا مستنيه تليفوناتكم ع 0100000000 او 0110000000 او 0120000000
اوع اميل البرنامج على هواك ات نيل راديو بروداكشن دوت كوم .......
برعايه توتا كومبانى وان تاتش وكريمات زحلقها ياما زحلقها .......
نستقبل اول اتصال تليفونى ونقول الو؟
** الوو ؟
الوووووووو؟
انتى ياحاجه!!!!!
واضح ان الخط اتقطع.....
** الو ايوة يالوما..
- اهلانتعرف بيكى؟
- بثمه من بنها.
- اهلا بيكى يا بسمه ياريت تعلى صوتك شويه .
- معلث يالوما اثل انا بتكلم من تحت البطنيه ...
- مفهوم طبعا علشان محدش يقفشك وانتى بتتكلمى بسمه النهارده بنتكلم عن الاستهبال فى الحب تقدرى تقوليلى يعنى ايه الاستهبال فى الحب وبيمثلك ايه؟
- بثى يالوما انا بموت موت موت جدا فى البرنامج بتاعك والله مث بفوت ولا حلقه منه خالث وثلميلى ع الشقى الحكروت موت موت وحتومه وقوليله انه لذيذ موت موت وبنحبه اووووووووى .......
- هو بيضحك وفاتح بقه زى الحمار اهو وبيقولك ميرسى ليكى يا بسمه ...........
- يالوما انا بكلمك علشان الحلقه بتاعت النهارده وخثوث علشانى انا كنت بحب واحد وانا فى تانيه ابتدائى وفضلنا نحب بعض للجامعه ...
- جميل جميل وبعدين يابسمه؟
- اهئ اهئ اهئ..........
- لا اهدى يابسمه وقوليلى ايه اللى حصل ......
- يالوما اخد كل حاجه كل حاجه حتى الموبايل اهئ اهئ اهئ .......
- طيب اهدى يا بسمه بصى يا بسمه الحب شعور متبادل بين اتنين مينفعش طرف واحد لازم الطرفين يكونوا متفاهمين ومتعاونين هو دا الحب اللى هيدوم طول العمر وبكدا نحل كل المشاكل اللى تقابلنا حتى مشكله غسيل الالوان مع الابيض لان تايد برغوته الجديده حل المشكله .......
** مستمعينا نسينا نقول ان تايد من رعاه البرنامج مع تاااااااااااااايد فى الغسيل مفيش مستحيل ...........
بشكرك يا بثمه على اتصالك وبهديلك اغنيه السوبر ستار .......
( ياقاعده ع الترعه وبتغسلى مواعين جاتك ستين وكسه اخدتى ايه من الغسيل )
** وانا والبطيخ وهواك برنامج للحب وعن الحب مع لوما قصدى لومى الله يخرب بيتك يا بسمه لسانى اتعوج..........
** الوقت بيمر معاكم بسرعه وحاتم بيضحك مش عارفه ليه بس تقريبا البتاللى بتبيع الترمس ع دليسيبس حولتله 5 جنيه .....
هاااه 10 جنيه؟
طيب اشطه يا حتوم اختك بقى هاااا.............
*** وجالنا اس ام اس كتير النهارده معلش علشان وقت البرنامج هناخد اميل واحد بس !!!!!!
* هاااى لوما بحبك موت وبحب صوتك وبحب كلامك بجد وهدؤك بالكلام بحبك اوووى موت انا اتعرفت عواحد من ع النت وبحبه موت وقابلته ونفسى احسسه بمشاعرى اعمل ايه ارجو الرد .....
* شكرا ياقمر ع كلامك وههديكى الاغنيه السوبر دى .......
( يامسجون فى لومان طره نفسى اكل معاك كوزين دره )
*** الوقت بيمر معاكم بسرعه ووقت حلقتنا انتهى معاكم لومى ع نجوم اف ام مزيكا ع كيف كيفك فى انا والبطيخ وهواك من 12 : 2 وبشكر كل اللى كلمنا وبعتلنا اس ام اس مع انا والبطيخ وهواك استنونا كل يوم حد فى نفس الوقت قبل بساعتين من دلوقتى ع نجوم اف ام 100.6 مزيكا ع كيف كيفك ...........
** برعايه :.
مصنع كوبيات ام سمير وسوق السباعى ومصنع كريمات ام عويس ونادى قحافه وسمنه البقرتين.........
~ البلد ~
